Əmək qanunvericiliyinin işçi sayı ilə bağlı hansı tələbi mövcuddur?

Əmək Məcəlləsində işçi sayı ilə bağlı müəyyən tələblər müəyyən edilib. Əmək Məcəlləsinin 223-cü maddəsinə əsasən, Əməyin mühafizəsi işinin təşkili və əməyin mühafizəsi üzrə qanunvericiliyin tələblərinə əməl edilməsinə nəzarətin həyata keçirilməsi üçün iqtisadiyyatın bütün sahələrinin müəssisələrində işçilərin sayı əlli nəfərdən çox olduqda əməyin mühafizəsi xidmətləri yaradılmalıdır. Həmin maddəyə əsasən, işçilərinin sayı əlli nəfərdən çox olan müəssisələrdə əməyin mühafizəsi üzrə mühəndis vəzifəsi, işçilərinin sayı beş yüz nəfərdən artıq olduqda isə müəssisə rəhbərinin (baş mühəndisinin) əməyin mühafizəsi üzrə müavini vəzifəsi təsis edilir. Min nəfərdən çox işçinin çalışdığı müəssisələrdə sənaye-sanitariya laboratoriyası təşkil olunur, habelə əməyin gigiyenası üzrə həkim vəzifəsi təsis edilir.

Qeyd edək ki, əməyin mühafizəsi xidmətinin rəhbərləri və mütəxəssisləri öz vəzifələrinə aid olmayan işlərin yerinə yetirilməsinə cəlb edilə bilməzlər və vəzifə borclarını düzgün və keyfiyyətli yerinə yetirməməyə görə qanunvericiliklə müəyyən edilmiş qaydada məsuliyyət daşıyırlar. Qeyd edək ki, ƏMAS altsistemi tərəfindən işçi sayının 50-dən çox olan işəgötürənlərə əməyin mühafizəsi xidməti ilə bağlı işçi qəbulu ilə bağlı xəbərdarlıq bildirişi də göndərməsinə rast gəlinir.

SƏTƏM işçisinin mütləq sertifikatı və ya ali təhsili olmalıdır?

Qeyd etdiyimiz kimi, Əmək Məcəlləsinin 223-cü maddəsinə əsasən, əməyin mühafizəsi işinin təşkili və əməyin mühafizəsi üzrə qanunvericiliyin tələblərinə əməl edilməsinə nəzarətin həyata keçirilməsi üçün iqtisadiyyatın bütün sahələrinin müəssisələrində işçilərin sayı əlli nəfərdən çox olduqda əməyin mühafizəsi xidmətləri yaradılmalıdır. 

Həmin maddənin ikinci hissəsinə görə, əməyin mühafizəsi xidmətinin tərkibinə əmək qanunvericiliyini, əməyin mühafizəsi normalarını mükəmməl bilən mütəxəssislər daxil edilir.

Göründüyü kimi, əməyin mühafisəzi xidmətində çalışan işçilərin mütəxəssis olması tələb edilir. İşəgötürən işə qəbul zamanı namizəddən əmək qanunvericiliyini və əməyin mühafizəsi normalarını mükəmməl bilməsini təsdiq edən sənədləri tələb edə bilər.